Kryeministri, Edi Rama, reagoi sot ndaj kundërshtimeve për propozimin e Partisë Socialiste për reformën administrativo-territoriale, duke i cilësuar si normale protestat që u zhvilluan në disa bashki.

Rama tha se dokumenti i reformës ndodhet në fazën ligjore të konsultimit 60-ditor, gjatë së cilës çdo qytetar dhe institucion ka të drejtë të shprehë mendimin.

Sipas tij, kryetarët e bashkive dhe këshillat bashkiakë janë të detyruar me ligj të paraqesin me shkrim qëndrimet e tyre.

“Vazhdon qarja e hallit të kalorësit se po i varen këmbët, së fundi edhe me një agjitim të madh nga vajtorët e vajtojcat, pse tanimë po protestohet edhe “brenda PS” dhe kjo qenka një shenjë tmerrsisht e keqe për “regjimin”.

“Në fakt jo, përjashto aktin e turpshëm të djegies së teserave të PS në një rast, nga disa individë që as vetë s’kanë ditur tamam ç’kanë bërë apo ndonjë rast kur deputetë tanët kanë bërë “tribunin e vegjëlisë” pa ditur tamam çfarë thonë, gjithçka tjetër është jo vetëm normale po edhe e mirëseardhur.

“Një, sepse dokumenti i reformës së propozuar është pikërisht në fazën e vet të konsultimit publik ligjor prej 60 ditësh dhe kjo fazë do të thotë pikërisht, bujrum gjithkush të shprehet lirisht për propozimin.

“Dy, sepse sipas ligjit kryetarët e bashkive e këshillat bashkiakë duhet të shprehen me shkrim për qëndrimet e tyre dhe është krejt e kuptueshme që ata që janë kundër të shprehen edhe me forma të tjera paqësore – për sa kohë nuk bllokojnë rrugë e nuk pengojnë të tjerët të bëjnë jetën e tyre, duke u futur vetë në konflikt me ligjin dhe me PS bashkë”, shkruan Rama.

Rama nënvizoi se nuk ka dhe nuk do të ketë asnjë vendim brenda PS-së që pengon shprehjen e lirë të opinioneve për reformën. Ai shtoi se vendimi përfundimtar do të merret nga Kuvendi, ndërsa gjatë konsultimit do të dëgjohen të gjitha palët, përfshirë bashkitë që kërkojnë ndryshime në propozimin aktual.

“Tre, sepse as në Shqipëri nuk ka regjim, as në PS nuk ka dhe nuk do të ketë asnjë vendim për të shkurajuar askënd që të shprehë opinionin e vet për këtë reformë, për të cilën sigurisht do të vendosë parlamenti, por deri atëherë të gjithë do të dëgjohen, përfshirë edhe bashkitë që mund të duan të integrojnë tek vetja bashki më të vogla që në propozimin aktual mbeten siç janë”, shkruan Rama.

Kryeministri theksoi gjithashtu se gjatë 60 ditëve të konsultimit do të shpjegohen më gjerësisht arsyet që kanë çuar në hartimin e reformës, duke sqaruar se propozimet janë bazuar në kritere objektive.

“Nga ana tjetër të gjithë do të informohen shumë më tepër përgjatë këtyre 60 ditëve lidhur me arsyet logjike të propozimeve – ku nuk ka pasur si të merren parasysh reputacioni i zonës bashkiake që nga koha e antikitetit, numri i të rënëve në luftrat e 2000 vjetëve të fundit apo të tjera të dhëna e gojëdhana të kësaj natyre, të cilat s’kanë qenë dhe s’mund të jenë farë argumenta në këtë debat”, theksoi Rama.

Burimi ATSH