Administrata Tatimore vijon të ofrojë asistencë për tatimpaguesit në të gjithë vendin, përmes shërbimeve elektronike dhe strukturave të saj në terren.

Sipas Drejtorisë së Përgjithshme të Tatimeve, vetëm gjatë muajit qershor 2026, mijëra tatimpagues dhe individë morën mbështetje përmes platformës e-Filing, Call Center-it dhe Drejtorive Rajonale Tatimore, në funksion të përmbushjes së detyrimeve tatimore dhe përdorimit të shërbimeve online.

Referuar shifrave zyrtare 16 630 tatimpagues janë asistuar sy më sy, 15 642 tatimpagues kanë marrë përgjigje nëpërmjet e-Filing; 6947 të tjerë janë asistuar me telefon dhe 2003 tatimpagues janë asistuar nga call center nëpërmjet thirrjeve hyrëse.

Administrata Tatimore bën të ditur se asistenca vijon edhe për fermerët e regjistruar, në kuadër të procesit të aplikimit për kompensimin 10% përmes autofaturës.

Për çdo paqartësi ose nevojë për mbështetje gjatë procesit të aplikimit, fermerët ftohen t’u drejtohen Drejtorive Rajonale Tatimore ku janë të regjistruar.

Sipas Tatimeve, ofrimi i asistencës përmes kanaleve të ndryshme të komunikimit synon të lehtësojë procedurat për tatimpaguesit, të rrisë aksesin në shërbimet elektronike dhe të sigurojë mbarëvajtjen e proceseve tatimore.