Drejtori i përgjithshëm i Policisë së Shtetit, Drejtues Madhor Skënder Hita, u shpreh sot për gazetarët, pas inaugurimit të Drejtorisë Vendore të Policisë Berat, se investimi përtej përmirësimit të kushteve të punës për punonjësit e Policisë së Shtetit, do t’u shërbejë drejtpërdrejt edhe qytetarëve të Beratit dhe të gjithë qarkut, duke u ofruar një shërbim edhe më cilësor.

“Këto ambiente moderne, të ndërthurura me profesionalizmin, etikën dhe sjelljen korrekte të punonjësve të Policisë ndaj qytetarëve, do të ndikojnë në rritjen e cilësisë së shërbimit dhe në forcimin e sigurisë, si për banorët e këtij qarku, ashtu edhe për turistët që vizitojnë qytetin e Beratit”, theksoi Hita.

I pyetur në lidhje me nivelin e ulët të kriminalitetit në Berat, Hita tha se kjo nuk do të thotë se, për shkak të këtij niveli të ulët, duhet të ulet vëmendja ndaj fenomeneve kriminale.

“Edhe gjatë takimit të sotëm diskutuam për çështje që kërkojnë angazhim të vazhdueshëm, si shpërndarja e lëndëve narkotike pranë shkollave dhe kultivimi i bimëve narkotike, fenomene që prekin të gjithë shoqërinë”, vuri në dukje ai.

“Këto problematika do të jenë në fokus të punës së Drejtorisë Vendore të Policisë Berat, ashtu si edhe i të gjitha strukturave të Policisë së Shtetit, me synim goditjen e çdo veprimtarie kriminale dhe garantimin e një mjedisi sa më të sigurt për qytetarët”, përfundoi Hita.

Marrë nga ATSH