Kryeministri Edi Rama ka reaguar për Aktin Normativ të miratuar në qeveri për bonusin e verës për pensionistët, duke e cilësuar atë si një pasqyrë të rritjes ekonomike dhe mundësive që ajo krijon për zgjerimin e politikave sociale dhe investimeve publike.

Në një postim në rrjetet sociale, Rama thekson se akti mundëson një tjetër bonus për pensionistët, rritje të mbështetjes për personat me aftësi të kufizuara, fëmijët me nevoja të veçanta, përfshirë autizmin, si dhe për kujdestarët e tyre.

Ai nënvizon gjithashtu se është miratuar një paketë e gjerë masash mbështetëse që përfshin teknologjinë, sipërmarrjen, shëndetësinë, bujqësinë dhe zhvillimin urban e rural, ndërsa veçon edhe rritjen e financimit për mbrojtjen, të cilën e cilëson si më të madhin ndonjëherë në historinë e Forcave të Armatosura.

“Në ditët në vijim do të shpjegojmë çdonjërën nga masat, por mbetet domethënëse kalimi tek bonusi i pensionistëve edhe i të gjithë të ardhurave shtesë nga rritja e çmimit të naftës”, shtoi Rama.

Ndërkohë, ministrja e Ekonomisë dhe Inovacionit, Delina Ibrahimaj, bëri të ditur se qeveria ka vendosur akordimin e një bonusi të ri për pensionistët, në vlerën 5 mijë lekë, i cili do të nisë të shpërndahet që nga dita e nesërme.

Ajo sqaroi se masa përfshin të gjitha kategoritë e rreth 777.200 pensionistëve, përfshirë pensionet e pleqërisë, invaliditetit, familjar dhe përfituesit e trajtimeve të veçanta financiare.

Sipas saj, efekti financiar i bonusit është rreth 3,7 miliardë lekë dhe mbështetet në rritjen e të ardhurave buxhetore dhe performancën pozitive të ekonomisë.

Ibrahimaj shtoi se qeveria do të vijojë politikat e mbështetjes për pensionistët, me synimin që rritja ekonomike të reflektohet drejtpërdrejt në të ardhurat e tyre.

Burimi ATSH