Kryeministri Edi Rama deklaroi gjatë fjalës së mbajtur në Konferencën Vjetore të Komisionit të Bllokut Lindor në Berlin se “Europa sot ka nevojë për guxim. Guximin e Kohlit”.

Rama u shpreh se Europa duhet të ketë guximin për t’u ribashkuar dhe për të krijuar novacion.

“Guximin për të pranuar se zgjerimi nuk është bamirësi, është strategji dhe guximin për të mbrojtur demokracinë jo vetëm nga ata që e sulmojnë nga jashtë, por edhe nga gërryerja e ngadaltë që mund ta dobësojë nga brenda”, u shpreh ai.

Kreu i Ekzekutivit nënvizoi se Shqipëria është gati të reformohet, të krijojë novacion dhe të kontribuojë.

“Shqipëria është gati të mbajë pjesën e saj të përgjegjësisë, por pyetja e vërtetë nuk është nëse Shqipëria është gati. Pyetja e vërtetë është nëse Europa është gati? Gati të përfundojë punën ende të pakryer të historisë së vet. Gati të ribashkojë gjeografinë e saj me imagjinatën e saj strategjike. Gati të veprojë mbi bazën e domosdoshmërisë, në vend që të administrojë shtyrjen sepse historia rrallë pret procedura të përsosura”, theksoi.

Kryeministri Rama shtoi se Europa, “pret udhëheqje të gatshme të kuptojë momentin dhe të veprojë menjëherë dhe këtu, në Berlin, ku Gjermania dikur gjeti guximin të ribashkonte paqësisht atë që historia e kishte ndarë me forcë, pyetja përpara së cilës gjendet Europa bëhet e qartë kristal: A është Europa gati për momentin e saj të ardhshëm Helmut Kohl? Nuk kam përgjigje”.