Ministri i Mbrojtjes Ermal Nufi gjatë vizitës zyrtare në SHBA, ka takuar në Uashington drejtoreshën në detyrë të Agjencisë së Bashkëpunimit për Sigurinë dhe Mbrojtjen, Mary Beth Morgan.

Në një postim në rrjetet sociale, Nufi bëri me dije se fokusi i diskutimit ishte avancimi në projekte me interes të përbashkët për të dy vendet.

Nufi u shpreh se “bashkëpunimi strategjik i Shqipërisë me Shtetet e Bashkuara të Amerikës, mbetet shtyllë themelore për modernizimin e FA-ve, rritjen e kapaciteteve mbrojtëse dhe forcimin e kontributit të vendit në kuadër të aleancës brenda NATO-s”.

Ministri i Mbrojtjes ndodhet në SHBA në vizitë zyrtare në kuadër të aktiviteteve të organizuara për 25-vjetorin e partneritetit të suksesshëm ndërmjet Shqipërisë dhe Gardës Kombëtare të Nju Xhersit, një bashkëpunim që ka kontribuar ndjeshëm në forcimin e kapaciteteve të mbrojtjes, sigurisë dhe ndërveprueshmërisë ndërmjet dy vendeve aleate.

Përgjatë kësaj jave në SHBA, ministri Nufi ka marrë pjesë në disa aktivitete në Nju Xhersi në kuadër të 25-vjetorit të Programit të Partneritetit Shtetëror, ndërsa ka pasur takime edhe në Uashington si dhe bisedime dypalëshe në fushën e Mbrojtjes.

Burimi ATSH