Të ardhurat e mbledhura nga Administrata Doganore gjatë periudhës mars-maj 2026 arritën në 62,1 miliardë lekë, duke tejkaluar planin e parashikuar dhe duke shënuar rritje krahasuar me të njëjtën periudhë të vitit të kaluar.

Sipas të dhënave të publikuara nga Drejtoria e Përgjithshme e Doganave, niveli i realizimit të të ardhurave arriti në 101,9% të planit, ose 1,1 miliardë lekë më shumë se objektivi i vendosur për këtë periudhë.

Krahasuar me muajt mars-maj të vitit 2025, të ardhurat doganore rezultojnë 3 miliardë lekë më të larta, duke reflektuar një ecuri pozitive të aktivitetit tregtar dhe të performancës së administratës doganore.

Treguesit e periudhës tremujore dëshmojnë gjithashtu një rritje prej 5,2% të të ardhurave të realizuara në raport me të njëjtën periudhë të vitit të kaluar.

Administrata Doganore vlerëson se rezultatet e arritura pasqyrojnë forcimin e administrimit fiskal, rritjen e eficiencës në mbledhjen e të ardhurave dhe përmirësimin e proceseve të kontrollit dhe monitorimit të mallrave në pikat doganore.

Marrë nga ATSH