Ministrja e Shëndetësisë dhe Mirëqenies Sociale, Evis Sala mori pjesë në Forumin e 11-të Botëror të Kancerit 2026, organizuar nga revista prestigjioze “The Economist”, ku u diskutuan sfidat dhe zgjidhjet për garantimin e aksesit të barabartë në kujdesin ndaj kancerit në të gjithë Evropën.

Gjatë fjalës së saj, ministrja Sala theksoi se pabarazitë në trajtimin e kancerit nuk mund të adresohen përmes reformave të fragmentuara, por kërkojnë transformim të plotë të sistemit shëndetësor, duke përfshirë parandalimin, depistimin, diagnostikimin e hershëm, trajtimin dhe kujdesin pas trajtimit.

Ajo nënvizoi se aksesi mbetet sfida kryesore në Evropë, duke theksuar se mundësitë për mbijetesë nuk duhet të varen nga vendbanimi i pacientit.

Ministrja renditi faktorët vendimtarë për reduktimin e pabarazive: diagnostikimi i hershëm, qasja në trajtime inovative dhe zhvillimi i kapaciteteve të sistemeve shëndetësore.

Ministrja Sala prezantoi reformat që Shqipëria po ndërmerr në sektorin e onkologjisë, ndër më të rëndësishmet në sistemin shëndetësor të vendit, me fokus në rritjen e aksesit, cilësisë dhe barazisë në shërbime:

Krijimin e Institutit Kombëtar të Kancerit si qendër kombëtare për kujdesin e integruar, kërkimin shkencor dhe edukimin;

Përmirësimin e legjislacionit për barnat dhe pajisjet mjekësore, duke e harmonizuar atë me standardet e Bashkimit Evropian;
Përshpejtimin e transformimit digjital në shëndetësi për të përmirësuar koordinimin e kujdesit, sistemet e referimit dhe përdorimin e të dhënave shëndetësore.

Ministrja e Shëndetësisë dhe Mirëqenies Sociale theksoi se suksesi i politikave të kancerit nuk duhet të matet vetëm me përparimet shkencore, por edhe me aftësinë e sistemeve shëndetësore për të ofruar diagnozë më të shpejtë, kohë më të shkurtër pritjeje dhe kujdes më të koordinuar për pacientët.

Burimi ATSH