Ministri i Turizmit, Kulturës dhe Sportit, Blendi Gonxhja, njëherazi drejtues politik për njësinë administrative Kashar, informoi sot banorët e Yrshekut dhe komunitetet e tjera të prekura nga zgjerimi i autostradës Tiranë-Durrës se Autoriteti Rrugor Shqiptar ka hapur procedurën për realizimin e 6 mbikalimeve për këmbësorët, si pjesë e projektit të plotësimit të punimeve në këtë aks rrugor.

Në përgjigje të shqetësimeve të ngritura nga banorët për aksesin dhe sigurinë në autostradë, Gonxhja bëri të ditur se procedura e tenderimit për projektin “Plotësimi i punimeve dhe përmirësimi estetik nga ish-sheshi “Shqiponja” deri te nënkalimi i Limuthit” pritet të mbyllet më 15 qershor.

Sipas informacionit të përcjellë nga ARrSh, kontrata përfshin jo vetëm ndërtimin e mbikalimeve për këmbësorët, por edhe sistemin e ndriçimit, gjelbërimin, barrierat akustike, riveshjen e tuneleve pranë sheshit “Shqiponja”, sistemimin e shtresave asfaltike, zëvendësimin e barrierave të betonit dhe përmirësimin e rrugëve dytësore pranë nënkalimit të Limuthit.

Gonxhja sqaroi se mbikalimi i parë do të ndërtohet në kilometrin 00+430, rreth 100 metra pas VEKO Group, ndërsa i dyti në kilometrin 1+645, rreth 50 metra përpara Universitetit Polis. Mbikalimi i tretë do të vendoset në kilometrin 2+472, rreth 200 metra pas QTU-së dhe urës së Lumit Lana. Sipas tij, banorët e Yrshekut do të kenë akses të drejtpërdrejtë në mbikalimet e dytë dhe të tretë.

Ndërkohë, mbikalimi i katërt do të ndërtohet në kilometrin 3+537, pranë BRUNES, i pesti në kilometrin 4+268, rreth 100 metra përpara FedEx Albania, ndërsa i gjashti në kilometrin 4+934, rreth 325 metra përpara Autostar.

Ministri theksoi se zëvendësimi dhe rivendosja e mbikalimeve për këmbësorët është bërë publik edhe më herët nga ARRSH në komunikimet e saj gjatë muajve prill dhe maj.

Ndërtimi i këtyre veprave synon të rrisë sigurinë e qytetarëve dhe të përmirësojë aksesin për komunitetet që jetojnë përgjatë autostradës Tiranë-Durrës. Pas përfundimit të procedurës së tenderimit dhe shpalljes së fituesit, pritet të nisë zbatimi i punimeve.

Burimi ATSH