Ministri i Turizmit, Kulturës dhe Sportit, Blendi Gonxhja, mori pjesë në çeljen e sezonit turistik në Pogradec, ku u prezantua edhe një fluturim simbolik me hidroplan, si një nismë që synon të promovojë forma të reja të zhvillimit turistik dhe të forcojë ndërlidhjen mes liqeneve, qyteteve dhe rajonit.

Gjatë vizitës në Pogradec, ministri Gonxhja, së bashku me kryetarin e bashkisë, Ilir Xhakolli, zhvilluan një takim me operatorët turistikë të zonës, ku diskutuan mbi ecurinë e sezonit, potencialet e zhvillimit dhe sfidat që kërkojnë bashkëpunim ndërinstitucional.

Në fokus të bisedimeve ishin menaxhimi i plazheve bregliqenore, përmirësimi i shërbimeve për vizitorët, ruajtja e pastërtisë dhe mbrojtja e mjedisit, si elementë kyç për rritjen e cilësisë së ofertës turistike dhe për garantimin e një eksperience sa më të mirë për turistët.

Gonxhja vlerësoi kontributin e sipërmarrësve lokalë në zhvillimin e turizmit dhe shprehu gatishmërinë për të vijuar bashkëpunimin në funksion të zhvillimit të qëndrueshëm të sektorit.

“Pogradeci mbetet një nga destinacionet më të veçanta të vendit, me vlera të spikatura natyrore, kulturore dhe turistike. Angazhimi ynë është të mbështesim çdo përpjekje që rrit cilësinë e ofertës turistike dhe promovon potencialin e jashtëzakonshëm të kësaj zone”, u shpreh ministri Gonxhja.

Pogradeci është një nga destinacionet më të frekuentuara gjatë sezonit veror, duke tërhequr çdo vit mijëra vizitorë vendas dhe të huaj falë liqenit, trashëgimisë kulturore dhe mikpritjes karakteristike të zonës.

Burimi ATSH