Kryeministri Edi Rama ftoi sot në një bashkëbisedim publik një grup prej 20 personash, të cilët kanë protestuar lidhur me investimin në Zvërnec.

Rama reagoi ndaj fyerjeve të protestuesve ndaj tij gjatë protestës së djeshme para Kryeministrisë, ndërsa u shpreh i gatshëm për t’i dëgjuar për Zvërnecin dhe çdo çështje tjetër me interes publik.

“Mua këtu më keni, gjithmonë gati për t’ju dëgjuar, nëse doni të flasim për Zvërnecin, për arrogancën, për dhunën, për mosinformimin, për transparencën, për pronat, për investimet e huaja, për natyrën, flamingot, shqiponjat, apo për çdo çështje tjetër me interes publik”, u shpreh Kryeministri.

Më poshtë reagimi i plotë i kryeministrit Rama:

“Çuna,

Unë sinqerisht ju pëlqej vërtetë, sidomos ata ndër ju që votojnë për mua – ka plot aty jashtë këtij korit udhëheqës – dhe mbi të gjitha, sepse të paktën jeni më të freskët se sa mbeturinat politike që më vijnë poshtë dritares tash 13 vjet, por nëse ky është vizioni juaj për mbrojtjen e natyrës dhe për “Shqipërinë e Shqiptarëve”, ju uroj sinqerisht shumë fat në të ardhmen, sepse do t’ju duhet.

Deri atëherë, mua këtu më keni, gjithmonë gati për t’ju dëgjuar, nëse doni të flasim për Zvërnecin, për arrogancën, për dhunën, për mosinformimin, për transparencën, për pronat, për investimet e huaja, për natyrën, flamingot, shqiponjat, apo për çdo çështje tjetër me interes publik.

Sepse robt e shtëpive tona janë interes privat dhe të tillë duhet të mbeten them unë apo jo?

Po që kjo imja të mos mbetet thjesht një larje goje në rrjete sociale apo largqoftë të merret si tallje me ju, mblidhuni jo më shumë se 20 vetë dhe bujrum: ulemi në një bashkëbisedim publik, ku të doni dhe kur të doni.

Nëse doni, natyrisht.

Se po nuk deshët, prapë i kemi punët tona:
ju në kor me robt e shtëpisë time,
unë në krye të punëve të Shqipërisë, me votën e shqiptarëve, për Shqipërinë 2030 në Bashkimin Europian”.

Marrë nga ATSH