Kryeministri Edi Rama, njëherësh kryetar i Partisë Socialiste deklaroi sot se PS është forca politike që ka mishëruar vullnetin për të ndërtuar dhe jo instiktin për të shkatërruar.

Në takimin e zhvilluar në Lezhë për 35-vjetorin e PS-së, Rama tha se PS është forca politike që ka qenë gjithmonë zëdhënëse e pajtimit, e afrimit, e bashkëpunimit dhe jo e përçarjes, e ndarjes dhe e hakmarrjes.

“Sot e gjithë ditën, PS është një forcë politike që ka mishëruar qytetarinë europiane dhe jo hakmarrjen primitive”, u shpreh Rama.

Nga ana tjetër, Rama theksoi se kundërshtarët politikë e kanë kthyer Shqipërinë në një vend të përçarë.

“Një përçarje që shkoi deri në fshatin më të largët ku edhe fqinjët filluan të mos i flasin më njëri-tjetrit në emër të partive. Këtë përçarje e mbollën dhe e ushqejnë dhe sot e gjithë ditën ata që PS i ka pasur gjithmonë përballë. Sot në fakt i kemi mbrapa, sepse përpara kemi vetëm objektivin historik, majën ku do të vendosim flamurin e Gjergj Kastriotit edhe të Ismail Qemalit në oborrin e shtëpisë europiane”, shtoi Rama.

Sipas tij, vetëm PS ka një raport të drejtë me shoqërinë.

“Ne nuk i ndajmë njerëzit, nuk i kemi ndarë kurrë në të tanët dhe të tyret. Pavarësisht se edhe në PS jo të gjithë janë të lumtur kur shikojnë se si dyert hapen edhe për ata që vijnë nga rrugë të tjera të jetës politike. Prapë se prapë ata ndjehen në shtëpinë e tyre kur vijnë në shtëpinë tonë dhe bëhen pjesë e jona dhe të gjithë së bashku çojmë përpara projektin e transformimit të Shqipërisë”, tha Rama.

Ndërkohë, sipas tij, “kjo nuk ndodh në anën tjetër ku njerëzit janë trajtuar si armiq”.

“Janë trajtuar si armiq socialistët që e përfaqësuan në fillimet e veta PS-në. Nuk kishin asnjë mundësi të kishin kushte të barabarta konkurrence. Kishte vetëm një ekran, ekrani i bardhë e zi i Radio Televizionit shtetëror, ku gëlonte propaganda kundër PS-së dhe ku edhe kur një përfaqësues i PS-së dilte në lajme, nuk dilte me zërin e vet, por figura mbulohej me komente denigruese për PS-në”, tha Rama.

Rama kujtoi se opozita e asaj kohe e pati kryetarin në burg për një kohë të gjatë, të futur me dhunën e një drejtësie politike.

“Një drejtësi politike e asaj kohe kur PS nuk arriti dot të nxjerrë rezultatin e zgjedhjeve pluraliste, sepse zgjedhjet nuk ishin pluraliste. Zgjedhjet ishin zgjedhje të kontrolluara me shkop gome dhe me shkop gome u rrahën e u masakruan përfaqësuesit e partisë tonë, gjë që sot është e paimagjinueshme për të gjithë të rejat dhe të rinjt që janë këtu”, tha Rama.

Marrë nga ATSH