Kryeministri Edi Rama ndodhet sot në Bruksel ku do të mbahet Konferenca e 8-të Ndërqeveritare Shqipëri – Bashkimi Europian, e cila hap zyrtarisht rrugën për futjen e Shqipërisë në fazën e mbylljes së negociatave për anëtarësimin në BE.

Përpara nisjes së konferencës, Rama ka zhvilluar një takim me zëvendësministren për Çështjet Europiane e Qipros, Marilena Raouna, vend i cili mban presidencën e radhës së BE-së, dhe me Komisioneren Europiane për Zgjerimin, Marta Kos.

Në fjalën e tij përpara nisjes së Konferencës ndërqeveritare, Rama u shpreh se, “është një moment shumë shumë i rëndësishëm në rrugëtimin tonë drejt anëtarësimit dhe është një moment për të cilin kemi punuar shumë fort qysh prej një kohe të gjatë”.

Konferenca ndërqeveritare vjen pas vendimit të miratuar nga Komiteti i Përfaqësuesve të Përhershëm të Shteteve Anëtare të Bashkimit Evropian (COREPER), i cili konfirmon plotësimin e Kushteve të Ndërmjetme në Grupkapitullin “Themelorët”, si dhe përcakton Kushtet për Mbylljen e negociatave për Kapitullin 23 “Gjyqësori dhe të Drejtat Themelore” dhe Kapitullin 24 “Drejtësia, Liria dhe Siguria”.

Burimi ATSH