Kryetari i Partisë Socialiste, njëherësh kryeministri Edi Rama, deklaroi sot se transformimi i Shqipërisë pasqyrohet edhe në treguesit ekonomikë të vendit.

Në aktivitetin e zhvilluar në Durrës me rastin e 35-vjetorit të Partisë Socialiste, Rama tha se Shqipëria ka shënuar rritje të konsiderueshme ekonomike gjatë viteve të fundit.

“Ky sot është një vend që kishte më pak se 10 miliardë euro prodhim. Sot ka kaluar 27 miliardë”, deklaroi Rama.

Sipas tij, paga mesatare një dekadë më parë ishte e paimagjinueshme, sot është 912 euro, ndërsa paga mesatare në sektorin publik është 1086 euro.

Rama tha gjithashtu se borxhi publik ka zbritur nën 50% dhe të ardhurat janë rritur pa rritur taksat.

Ai theksoi se kreditë bankare kanë arritur në 10 miliardë euro, ndërsa kreditë e këqija kanë zbritur nga 25%, në 3%.

“Investimet e huaja direkte ishin 300 milionë euro, 400 në rastin më të mirë në vit. Viti i shkuar u mbyll me 1,063 miliardë euro dhe do të vazhdojnë të rriten investimet e huaja dhe të brendshme”, tha Rama.

Rama siguroi se rruga e transformimit të vendit do të vijojë.

Burimi ATSH