Tradita, arti dhe kujtesa historike u bashkuan në aktivitetin e organizuar në kuadër të Ditës Ndërkombëtare të Vyshyvankës Ukrainase, një moment që vuri në pah lidhjet kulturore mes Ukrainës dhe Shqipërisë.

Ministri i Turizmit, Kulturës dhe Sportit, Blendi Gonxhja theksoi se Vyshyvanka ukrainase dhe Xhubleta shqiptare përfaqësojnë jo vetëm mjeshtëri artizanale, por edhe identitetin dhe shpirtin kulturor të dy popujve.

Sipas Gonxhes, secila prej tyre mbart simbolikë dhe histori të veçantë, duke dëshmuar vlerat e trashëgimisë kulturore që janë ruajtur ndër shekuj.

“Falë përkushtimit të artizanëve dhe bartësve të dijebërjes tradicionale, këto pasuri vijojnë të ruhen dhe të transmetohen ndër breza, duke forcuar dialogun kulturor dhe urat e bashkëpunimit mes dy vendeve”, u shpreh ministri.

Aktiviteti solli në vëmendje rëndësinë e ruajtjes së trashëgimisë shpirtërore dhe artizanale, si dhe rolin që kultura luan në afrimin e popujve dhe promovimin e vlerave të përbashkëta europiane.

Xhubleta shqiptare, e përfshirë në listën e trashëgimisë kulturore jomateriale të UNESCO-s, mbetet një nga simbolet më përfaqësuese të identitetit kulturor shqiptar, ndërsa Vyshyvanka konsiderohet simbol i rëndësishëm i traditës dhe historisë ukrainase.

Burimi ATSH