Kryeministri i Republikës së Estonisë, Kristen Michal vlerësoi Shqipërinë si një aleate të rëndësishme të aleancës së NATO-s dhe shprehu mbështetjen e Estonisë për anëtarësimin e Shqipërisë në BE.

Gjatë një deklarate të përbashkët për medie sot nga Estonia, me Kryeministrin Edi Rama, Michal, theksoi bashkëpunimin e dy vendeve si aleate të NATO-s.

“Shqipëria është një aleate shumë e rëndësishme në NATO. Faleminderit për kontributin tuaj në sigurinë e Rajonit Baltik”, u shpreh Michal në fjalën e tij.

Kryeministri estonez theksoi se, megjithëse dy vendet ndahen nga një distancë prej më shumë se dy mijë kilometrash, ato ndajnë të njëjtin vizion për sigurinë europiane.

“Ka më shumë se dy mijë kilometra distancë mes vendeve tona, por ne ndajmë të njëjtën pikëpamje, sepse siguria jonë është e ndërlidhur. Ndërsa i afrohemi samitit të ardhshëm për sigurinë, Europa duhet të marrë më shumë përgjegjësi për mbrojtjen e saj”, deklaroi ai.

Duke iu referuar luftës në Ukrainë, Michal tha se objektivat e Rusisë nuk kanë ndryshuar dhe se sulmet ndaj popullit ukrainas vijojnë çdo ditë.

“Rusia nuk është e pamundur të mposhtet dhe ne po punojmë së bashku për një paqe të drejtë dhe afatgjatë në Ukrainë”, tha kryeministri estonez.

Ai rikonfirmoi gjithashtu mbështetjen e Estonisë për integrimin europian të Shqipërisë.

“Ukraina i përket familjes europiane dhe kështu edhe Shqipëria. Estonia e mbështet zgjerimin e Bashkimit Europian dhe ne kemi mbështetur Shqipërinë në rrugëtimin e saj drejt BE-së. Vazhdoni me reformat për të ardhmen e vendit dhe qytetarëve tuaj. Nëse Shqipëria përmbush angazhimet e saj, atëherë edhe Bashkimi Europian do të bëjë të njëjtën gjë”, deklaroi Michal.

Burimi ATSH