Autoriteti Kombëtar i Ushqimit (AKU) ka nisur procesin e kategorizimit dhe vlerësimin për sigurinë ushqimore, për produktet me origjinë shtazore, qumështi, mishi, peshku dhe veza, si një masë për të përmbushur standardet e sigurisë së kërkuara nga procesi i integrimit në BE.

Drejtoresha e Autoritetit Kombëtare të Ushqimit (AKU) Blerina Gjylameti tha në konferencën e parë Kombëtare të Industrisë së Përpunimit të Qumështit se pas një skanimi që i është bërë sektorëve kanë nisur inspektimet nga trupa e AKU në stabilimente dhe fabrika.

“Do të verifikohen 253 operatorë për të parë se ku jemi. Në listë, verifikimet e inspektorëve do të përfshijnë komente të detajuara për të identifikuar ndryshimet e nevojshme. Në fund të raportit do të kemi të qartë se çfarë duhet të ndryshojë”, deklaroi ajo.

Gjylameti rikonfirmoi angazhimin e institucionit për përmbushjen e standardeve europiane të sigurisë ushqimore, duke e cilësuar këtë proces si pjesë të strategjisë kombëtare.

Konferenca shërbeu si një platformë bashkëpunimi mes industrisë dhe institucioneve, duke vënë theksin te rritja e cilësisë, sigurisë ushqimore dhe forcimi i kontrollit në zinxhirin e prodhimit dhe përpunimit të qumështit në vend.

Burimi ATSH