Administrata Doganore Shqiptare mori pjesë në sesionet e Komitetit të Përhershëm Teknik të Organizatës Botërore të Doganave, të zhvilluara në Bruksel (Belgjikë), me pjesëmarrjen e mbi 280 përfaqësuesve nga administratat doganore, organizatat ndërkombëtare dhe sektori privat.

Takimi u fokusua në modernizimin e operacioneve doganore, zhvillimet teknologjike, tregtinë elektronike ndërkufitare si dhe forcimin e bashkëpunimit ndërkombëtar për përballimin e sfidave të reja në fushën doganore.

Gjatë sesioneve u diskutuan dhe u miratuan një sërë instrumentesh dhe mekanizmash të rëndësishëm që mbështesin transformimin modern të administratave doganore, duke përfshirë përditësimin e modelit të të dhënave të OBD-së, raportin mbi teknologjitë inovative dhe transformuese për vitin 2026, udhëzues të përditësuar mbi Zonat e Lira Ekonomike, zhvillimet në kuadër të projektit Smart Customs, si dhe standardet dhe specifikimet teknike për tregtinë elektronike ndërkufitare.

Po ashtu u trajtuan sfidat që lidhen me rritjen e tregtisë elektronike ndërkombëtare, menaxhimin e riskut, përmirësimin e cilësisë së të dhënave dhe përdorimin e teknologjive të avancuara për lehtësimin e tregtisë së ligjshme dhe forcimin e kontrolleve doganore.

Sikurse, sesioni u ndal edhe në çështje që lidhen me tregtinë e qëndrueshme, kufijtë e brishtë, bashkëpunimin doganë-postë dhe zbatimin e Marrëveshjes për Lehtësimin e Tregtisë të Organizatës Botërore të Tregtisë.

Pjesëmarrja e Administratës Doganore Shqiptare në këtë forum të rëndësishëm teknik konfirmon angazhimin e saj për të ndjekur standardet dhe praktikat më të avancuara ndërkombëtare, në funksion të modernizimit të proceseve doganore, lehtësimit të tregtisë dhe forcimit të sigurisë në zinxhirin ndërkombëtar të furnizimit.

Burimi ATSH