Sfidat e anëtarësimit të Shqipërisë në Bashkimin Europian në sektorët e bujqësisë dhe mjedisit ishin në fokus të konferencës ndërkombëtare “Next Stop Europe”, që u organizua sot në Tiranë, nga Universiteti Bujqësor i Tiranës.

Në këtë aktivitet morën pjesë përfaqësues të institucioneve dhe akademikë, të cilët diskutuan mbi rëndësinë e strategjive kombëtare për sigurinë ushqimore, shëndetin publik, ekonominë dhe inovacionin.

Drejtoresha e Përgjithshme e Autoriteti Kombëtar i Ushqimit, Blerina Gjylameti, theksoi se siguria ushqimore tashmë përbën një strategji kombëtare me ndikim të gjerë në shëndetin publik, mjedisin dhe zhvillimin ekonomik.

Ajo nënvizoi se janë forcuar marrëdhëniet e bashkëpunimit me universitetin dhe partnerët ndërkombëtarë, me synim përmbushjen e standardeve europiane.

“Sot, Europa kërkon jo vetëm produkte ushqimore cilësore, por sisteme ushqimore të qëndrueshme, transparente dhe të besueshme. Integrimi europian nuk është vetëm një proces politik, por edhe një transformim i mënyrës se si prodhojmë, kontrollojmë dhe konsumojmë ushqimin”, u shpreh Gjylameti.

Konferenca vuri në dukje rëndësinë e harmonizimit të politikave dhe praktikave me standardet e Bashkimit Europian, si një hap i domosdoshëm në rrugën e integrimit të vendit.

Burimi ATSH