Banka e Shqipërisë ka hartuar ndryshime në ligjin “Për bankat”, që synojnë të sjellin një kuadër më të qartë dhe më të unifikuar rregullator për sektorin financiar, duke lehtësuar funksionimin e bankave dhe institucioneve të pagesave dhe duke rritur sigurinë dhe qartësinë për qytetarët dhe bizneset në përdorimin e shërbimeve financiare dhe pagesave elektronike.

Sipas relacionit shoqërues të projektligjit i cili ka dalë për konsultim publik, ndërhyrjet synojnë përafrimin e mëtejshëm të legjislacionit shqiptar me direktivat e Bashkimit Evropian, konkretisht Direktivën (BE) 2015/2366 për shërbimet e pagesave dhe Direktivën 2009/110/KE për institucionet e parasë elektronike.

Ndryshimet kryesore konsistojnë në shfuqizimin e përkufizimit të “institucionit të parasë elektronike” nga ligji aktual për bankat, si dhe në riformulimin e përkufizimit të “parasë elektronike”, duke iu referuar legjislacionit të posaçëm për shërbimet e pagesave.
Sipas projektligjit, rregullimi i institucioneve të parasë elektronike do të trajtohet tërësisht në ligjin “Për shërbimet e pagesave”, i cili përcakton kërkesat për licencim, ushtrimin e veprimtarisë dhe mbikëqyrjen e këtyre subjekteve.

Ndërkohë, termi “para elektronike” do të vijojë të përdoret në ligjin për bankat, pasi emetimi i saj mbetet një nga veprimtaritë që bankat mund të ushtrojnë, por pa përsëritur përkufizimin ligjor, i cili do të merret nga legjislacioni i posaçëm.

Banka e Shqipërisë argumenton se këto ndryshime rrisin qartësinë juridike, shmangin mbivendosjet dhe përmirësojnë koherencën e kuadrit ligjor në sektorin financiar, duke forcuar njëkohësisht harmonizimin me standardet evropiane.

Projektligji, i hartuar nga Banka e Shqipërisë, është pjesë e angazhimeve të Shqipërisë në kuadër të procesit të integrimit evropian dhe përmbushjes së piketave për Kapitullin 4 “Lëvizja e lirë e kapitalit”.

Burimi ATSH