Agjencia e Mbikëqyrjes Policore (AMP) organizoi një ceremoni të veçantë në mbyllje të një cikli trajnimesh për 23 punonjës të institucioneve të sigurisë.

Sipas AMP-së, pas një trajnimi 3-javor për hetimin e krimit, u vlerësuan me certifikata 19 punonjës të institucioneve të sigurisë që i përkasin Agjencisë së Mbikëqyrjes Policore, dhe katër nga Inspektorati Policor i Kosovës.

Në këtë ceremoni, i pranishëm ishte edhe kreu i AMP-së, Klevis Qose, ndërsa ky cikël trajnimesh i mbështetur nga partnerët ndërkombëtarë përmes programit ICITAP dhe në bashkëpunim me Akademinë e Sigurisë synon forcimin e kapaciteteve institucionale në garantimin e zbatimit të ligjit.

Trajnimi, i cili zgjati tre javë, u fokusua në zhvillimin e aftësive bazë hetimore, duke përfshirë teknikat moderne të mbledhjes së provave, analizën e rasteve dhe standardet profesionale në zbatimin e ligjit.

Programi ICITAP dhe bashkëpunimi me Akademinë e Sigurisë mbeten një mbështetje e rëndësishme për avancimin e kapaciteteve në sektorin e sigurisë, në përputhje me praktikat më të mira ndërkombëtare.

Burimi ATSH