Mbi 2,1 milionë pasagjerë udhëtuan me linja ajrore gjatë tremujorit të parë të këtij viti, duke konfirmuar rritjen e vazhdueshme të transportit ajror në vend.

Sipas statistikave mbi transportin ajror, publikuar nga INSTAT-i në periudhën janar-mars 2026 udhëtuan 2.162.098 pasagjerë, kundrejt 2.083.050 pasagjerëve në të njëjtën periudhë të vitit të kaluar. Krahasuar me tremujorin e parë 2025, numri i pasagjerëve rezulton me rritje 3,8%.

Gjatë kësaj periudhe, në transportin ajror operuan 21 shoqëri ajrore të huaja, ndërsa në hapësirën ajrore shqiptare u regjistruan 74.329 lëvizje avionësh.

Nga totali i avionëve që përdorën hapësirën ajrore shqiptare, 82,6% përbëhet nga mbikalime. Në tremujorin e parë të vitit u regjistruan 12.898 fluturime dhe 61.431 mbikalime.

Edhe transporti i mallrave dhe postës nëpërmjet rrugës ajrore shënoi rritje. Volumi i mallrave arriti në 571 tonë, ku 74,2% përfaqëson mallra të hyrë dhe 25,8% mallra të dalë.

Krahasuar me tremujorin e parë të vitit 2025, volumi i mallrave të transportuara me rrugë ajrore u rrit me 3,8%, duke reflektuar zgjerimin e aktivitetit tregtar dhe logjistik.

Burimi ATSH