Shqipëria mirëpriti gjatë dy javëve të fundit misionin vlerësues të MONEYVAL, kundër pastrimit të parave dhe financimit të terrorizmit.

Përmes një videomesazhi, zëvendëskryeministrja Albana Koçiu e cilësoi këtë një moment kyç për të dëshmuar progresin konkret dhe drejtimin e duhur të reformave.

Koçiu theksoi se dalja nga lista gri e FATF për pastrimin e parave dhe përmirësimi i vazhdueshëm i treguesve financiarë dhe ekonomikë tregojnë qartë progresin e Shqipërisë duke forcuar pozicionin tonë si një partner strategjik dhe i besueshëm ndërkombëtar.

Zv/kryeministrja kujtoi se në vitin 2023, Shqipëria doli nga lista gri e vendeve me problematika në pastrimin e parave, një arritje e rëndësishme sidomos në një kohë kur edhe vende të tjera, përfshirë ato në Europë, mbeten ende pjesë e saj.

Sipas Koçiut, formalizimi i ekonomisë dhe avancimi i qeverisë në luftën kundër pastrimit të parave është përkthyer tashmë në më shumë besim dhe investime brenda sistemit bankar.

Një tjetër prioritet, sipas saj, “është edhe ulja e përdorimit të keshit dhe kalimi drejt një ekonomie digjitale dhe të gjurmueshme, duke ndërtuar një sistem financiar më të fortë, më transparent dhe plotësisht në përputhje me standardet europiane”.

Në këtë drejtim, Koçiu informoi se vetëm në fillim të këtij viti ka 30% më shumë transaksione online dhe 25% rritje të transaksioneve në euro.

“Gjatë vitit që lamë pas kemi 13% rritje të kreditimit të ekonomisë. Mbi 1,5 miliardë euro investime të huaja direkte, një rekord historik ky. Këta tregues flasin qartë: kapitali po qarkullon gjithnjë e më shumë brenda sistemit bankar në kanale të monitoruara dhe transparente. Paralelisht kemi trefishuar rastet e bllokimeve dhe sekuestrimeve të aseteve me origjinë të dyshimtë”, theksoi zv/kryeministrja.

Koçiu siguroi se qeveria shqiptare do të vijojë me vendosmëri reformat, duke ndërtuar një sistem financiar më të fortë, më transparent dhe plotësisht në përputhje me standardet europiane.

“Ligji i miratuar forcon ndjeshëm mekanizmat për monitorimin dhe bllokimin në kohë reale të transaksioneve të dyshimta. Tani teknologjitë e reja dhe inteligjenca artificiale na japin mundësinë për të rritur edhe më tej efektivitetin e kësaj lufte”, tha Koçiu.

Marrë nga ATSH