Presidenti Bajram Begaj dënoi sot me forcë sulmin e armatosur ndaj presidentit Donald Trump dhe Zonjës së Parë, Melania Trump gjatë darkës së korrespondentëve të Shtëpisë së Bardhë në në hotelin “Washington Hilton”.

Begaj në një reagim në rrjetin social “X” shkroi se në demokraci, ndasitë zgjidhen përmes ideve dhe dialogut dhe jo forcës.

“Sulme të tilla brutale që minojnë demokracinë dhe dëmtojnë vlerat themelore të saj janë të papranueshme. Shpreh solidaritet të plotë me popullin amerikan dhe i uroj Presidentit dhe Zonjës së Parë dhe të gjithë të pranishme të kenë shëndet dhe siguri”, u shpreh Begaj.

Presidenti i SHBA-së, Donald Trump, nuk pësoi lëndime, ndërsa drejtues të tjerë të lartë amerikanë u evakuuan nga darka vjetore e korrespondentëve të Shtëpisë së Bardhë në mbrëmjen e së shtunës, pas një kërcënimi të paqartë që rezultoi me të shtëna arme, sipas AP.

Sipas autoriteteve, incidenti ndodhi jashtë sallës së banketit në hotelin “Washington Hilton”, ku presidenti dhe të ftuarit po prisnin të fillonin aktivitetin.

Burimi ATSH