Ministri për Evropën dhe Punët e Jashtme, Ferit Hoxha zhvilloi një takim në Forumin Ekonomik të Delfit me Komisioneren për Zgjerimin të Bashkimit Evropian, Marta Kos, në kuadër të diskutimeve mbi procesin e integrimit evropian të Shqipërisë.

Në një postim në rrjetin social X, Hoxha u shpreh se, “procesi i anëtarësimit në Bashkimin Evropian nuk njeh pauzë dhe as nuk pranon pushim”.

“Zhvillimet intensive kërkojnë punë të pandërprerë dhe energji të vazhdueshme, para së gjithash nga ne, por edhe nga partnerët tanë, të angazhuar në vijën e parë”, theksoi Hoxha.

Ministri theksoi se me Komisioneren Kos diskutuan shumë çështje në funksion të avancimit të qëndrueshëm të procesit tonë madhor të integrimit.

“Duke shfrytëzuar praninë në Forumin Ekonomik të Delfit, pata kënaqësinë të zhvilloja një takim me Komisioneren për Zgjerimin, Marta Kos. Shumë çështje për të diskutuar, ndarë dhe koordinuar, në funksion të avancimit të qëndrueshëm të procesit tonë madhor”, theksoi Hoxha.

Burimi ATSH