Kryeministri Edi Rama deklaroi sot se qeveria ka një plan konkret investimesh për akreditimin e laboratorëve të kontrollit të qumështit dhe nënprodukteve të tij.

Sipas Ramës, nëse Shqipëria do të ishte sot anëtare e Bashkimit Europian, sektori i qumështit nuk do t’i mbijetonte dot kërkesës së standardeve.

“Është gjithë zinxhiri që duhet garantuar. Unë kam parë disa fabrika që janë me makineri të fjalës së fundit, që janë të certifikuara në disa aspekte, por zinxhiri është i mangët. Ne duhet të plotësojmë të gjithë zinxhirin”, tha Rama.

Ndaj sipas tij, duhet filluar menjëherë me një plan gradual dhe me dije të plotë për çfarë duhet bërë hap pas hapi.

“Pjesa e shtetit se nuk është një ushtrim i ndarë. Nuk është diçka që duhet ta bëni ju dhe të gjithë ata që janë në këtë fushë dhe ne thjesht do çojmë kontrolle. Kontrollet janë të vlefshme për t’ju ndihmuar dhe për këtë arsye kemi bërë dhe një strategji të këtyre kontrolleve, që nuk do të jenë kontrolle ndëshkimore. Nuk do jenë misione ndëshkimi, por do të jenë një mision kombëtar, një punë e përbashkët”, tha Rama.

Kontrollet, sipas tij, duhet të jenë në funksion të mbrojtjes së interesit publik, por edhe në mbështetje të çdo sipërmarrjeje që nuk është duke shkelur ligjin, por ka nevojë të rrisë standardet.

“Kapacitetet tona laboratorike do duhet të forcohen në shërbimin e sipërmarrjes për t’u gjendur më pranë dhe për të qenë më të mirë organizuara në territor, që mos presësh me ditë të tëra për të bërë një analizë. Dhe pikat e kontrollit kufitar janë një tjetër pikë e dobët. Ndaj ne kemi një plan konkret investimesh, akreditimi të laboratorëve, përmirësimit të pikave të kontrollit kufitar dhe infrastrukturë digjitale për të plotësuar nevojat e sistemit dhe për të lehtësuar ndërveprimin me subjektet përkatës”, tha Rama.

Burimi ATSH