Afrim Gashi tërhoqi sot vëmendjen për largimin e të rinjve nga vendi i tyre, ndërsa theksoi se në fokus të politikave të çdo vendi duhet të jetë gjetja e mekanizmave të duhur për ndalimin e këtij fenomeni.

Gjatë punimeve të Samitit IV të Diasporës në Tiranë, Gashi theksoi se qëllimi kryesor i politikave që duhet të ndërtojë çdo vend është të pengojë largimin e njerëzve.

“Kësaj ‘gjakderdhje’ demografike që po na ndodh viteve të fundit, kryesisht për arsye ekonomike, por edhe për arsye të mungesës së sundimit të ligjit, të zhvillimit demografik dhe të politikave arsimore, shëndetësore dhe kulturore duhet t’i gjejmë një zgjidhje”, tha ai.

Sipas tij, “nëse vazhdojnë këto trende, situata në vendet tona do të jetë alarmante”.

“Bëjmë shumë mirë që takohemi në një samit të tillë dhe në diskutimet tona apelojmë për dhe ngremë alarmin për gjendjen të cilën përjetojmë sot në shtetet tona. Problemi më i madh që mund të nënvizohet është kjo shpërngulje e njerëzve”, tha ai.

Sipas Gashit, gjatë viteve të fundit kemi kryesisht ikjen e të rinjve.

“Po ikin të rinjve më të mirë, studentët më të mirë, njerëzit që kanë performancat më të mira. Kjo është një humbje shumë e madhe për shoqëritë dhe shtetet tona ndaj mendoj se nëse duam ta bëjmë rilidhjen me ata njerëz, është e domosdoshme të fokusohemi urgjentisht në ndërtimin e politikave që do të ndalojnë këtë ‘gjakderdhje’ që po ndodh”, tha Gashi.

Sipas tij, “duhet patjetër të gjenden mekanizmat si të qëndrojnë njerëzit këtu dhe më pas të ndërtohen edhe politika që krijojnë kushte në vendet tona që të rinjtë të kthehen”.

“Një nga arsyet kryesore pse ikin të rinjtë është mungesa e shpresës. Me të gjitha turbulencat që na kanë ndodhur në vendet tona duke qenë të fokusuar në betejën politike, kemi harruar se çdo ditë po u dërgojmë mesazh të rinjve se në këtë vend nuk ka shpresë për ta, se partia është vendi i vetëm i avancimit të tyre”, shtoi ai.

Nëse kjo nuk ndalet, Gashi theksoi se “e ardhmja e shteteve dhe shoqërive tona nuk do të jetë e ndritur”.

Sundimi i ligjit, sipas tij, është arsyeja e parë pse të rinjtë braktisin vendin.

“Në disa prej vendeve tona ka përparim dhe avancim në këtë drejtim. Natyrisht që edhe Shqipëria është një prej vendeve që ka dëshmuar se ka në fokus sundimin e ligjit. Por nëse të rinjtë tanë vazhdojnë të ikin jashtë ky është indikatori më i mirë i dështimit të politikave tona. Nuk janë zgjedhjet indikatori më i mirë dhe mesazhi më i mirë që vjen prej popullit”, tha Gashi.

Burimi ATSH