Kryeministri Edi Rama, gjatë një bashkëbisedimi me pensionistët sot në Berat, tha se “qyteti i një mbi një dritareve” është dallëndyshja e parë e pranverës së rikthimit të njerëzve në Shqipëri.

Sipas Ramës, në Berat ka më shumë qytetarë të kthyer sesa të larguar.

“Berati është dallëndyshja e parë e pranverës së rikthimit të njerëzve në Shqipëri. Është vendi ku ka më shumë shqiptarë që janë kthyer sesa shqiptarë që janë larguar. Ky është një sinjal domethënës për të gjithë: pse kthehen më shumë dhe largohen më pak nga Berati.

Sepse në Berat gjithkush që ka një shtëpi ose një tokë mund të arrijë sukses, në kuptimin që mund të fitojë më shumë sesa duke punuar për dikë tjetër jashtë. Jashtë mund të duket sikur merr më shumë, por kur e sheh në pasqyrë, kur i zbriten të gjitha taksat nga paga dhe kur llogarit shpenzimet, rezultati bëhet më i ndërlikuar dhe jo aq i thjeshtë.

Ndërsa këtu është taksa zero, dhe ky është një oportunitet kur ke një destinacion turistik si Berati”, tha Rama.

Burimi ATSH