Kryeministri Edi Rama, njëherësh kryetar i Partisë Socialiste, mblodhi sot grupin parlamentar të Partisë Socialiste.

Mbledhja u zhvillua në ambientet e Kryesisë së Kuvendit, pa praninë e medieve.

Në fokus të takimit ishte angazhimi i deputetëve në punimet e Kuvendit, si dhe vijimi i takimeve me qytetarët në funksion të turit “Punët e Shqipërisë”.

Në fjalën e tij, Rama u shpreh se i kishte bërë përshtypje angazhimi dhe dëshira për të dëgjuar në çdo Asamble.

“Më ka bërë përshtypje angazhimi dhe dëshira për të dëgjuar në çdo Asamble faktikisht”, tha Rama.

Duke folur për turin “Punët e Shqipërisë”, Rama tha se ndryshe nga më parë, kur flet për ekonominë, ndjen nga atmosfera në sallë se ka një pranim të faktit që ekonomia ka hyrë në një rrugë që i jep të gjithëve shpresë dhe që ka vetëm përmirësim.

Kur flet për pagat, është shumë e qartë që njerëzit mund të bëjnë menjëherë verifikimin tek vetja dhe tek të tjerët përreth.

Sa i përket objektivit Shqipëria 2030 në BE, Rama theksoi se është sfida e sfidave.

“Kjo është sfida e sfidave jo për ne, por është sfida e sfidave për një forcë politike që gjendet me fatin e vendit në duar që ne të mbyllim një varg kapitujsh të historisë, duke vulosur përkatësinë europiane të Shqipërisë dhe duke siguruar anëtarësimin e Shqipërisë në BE”, tha Rama.

Sa i përket zgjedhjeve në Partinë Socialiste, Rama tha se procesi ka nisur për të energjizuar komplet PS-në në funksion të zgjedhjeve vendore.

“Ne kemi hyrë në këtë proces në radhë të parë për të energjizuar komplet PS-në në funksion të zgjedhjeve vendore. Se përballë ne kemi vetëm veten, sfidën që kemi për të realizuar misionin tonë”, tha Rama.

PS ka nisur turin “Punët e Shqipërisë”, ku zhvillohen takime me qytetarët në gjithë vendin për të diskutuar mbi problemet që kërkojnë zgjidhje konkrete.

Marrë nga ATSH