Ministri për Evropën dhe Punët e Jashtme, Ferit Hoxha, nga Korça deklaroi se integrimi në Bashkimin Evropian është një qasje realiste.

Gjatë një takimi me nxënës të shkollave të mesme “Themistokli Gërmenji” dhe “Raqi Qirinxhi” në Korçë, ministri Hoxha u shpreh se BE nuk është një qëllim në letër, por një standard jetese.

Ai theksoi se anëtarësimi në BE brenda vitit 2030 është një objektiv realist, por që kërkon gjithëpërfshirje dhe kontribut të vazhdueshëm nga të gjithë.

“Në një periudhë shumë të shkurtër kohe kemi bërë një rrugëtim të madh, diçka që as nuk e kishim ëndërruar. Unë i pari, edhe pse kam qenë i përfshirë në proces, nuk mendoja kurrë që Shqipëria do t’i hapte të gjitha kapitujt brenda vitit. Ja që u bë, ja që qenka i mundur. Pra i kemi mundësitë, aftësitë dhe energjitë; kemi kapacitetin dhe mendimet e qarta. Jemi të koordinuar, të disiplinuar dhe të vendosur për të bërë atë që i kemi thënë vetes dhe për t’u përballur me ato që u kemi premtuar partnerëve tanë evropianë”, tha ai.

Ministri Hoxha, javën e shkuar ishte në Korçë, ku zhvilloi një seri takimesh me studentë dhe nxënës në kuadër të turit të dialogut “BE dhe Ti: Evropa fillon këtu”.

Burimi ATSH