Kryeministri Edi Rama, njëherësh kryetar i Partisë Socialiste zhvilloi sot një takim me kryetarët e bashkive në kuadër të turit për “Punët e Shqipërisë”, ku diskutoi lidhur me prioritetet dhe problematikat në territor.

Një prej çështjeve të evidentuara në këtë takim ishte edhe forcimi i kapaciteteve vendore lidhur me pastrimin e territorit.

Kryeministri informoi se është përgatitur një projekt shumë i rëndësishëm për të mbështetur pushtetin vendor duke vënë në dispozicion të bashkive një flotë të re automjetesh që do të duhet të ndihmojnë të gjitha proceset që kanë të bëjnë me pastrimet e kanaleve dhe punën e domosdoshme parapërgatitore për sezonet e mëtejshme.

Ky investim, sipas tij, do të synojë lehtësimin e proceseve të ujitjes dhe pasojave që vijnë nga përmbytjet.

Rama theksoi se ky është një projekt që do të finalizohet në muajt në vijim me një mbështetje domethënëse financiare nga qeveria e Emirateve të Bashkuara.

“Në bazë të disa kritereve të thjeshta do të bëhet edhe alokimi i flotës në territor, duke i kaluar këto automjete në përdorim të bashkive”, tha Rama.

Burimi ATSH