Kryeministri Edi Rama, njëherësh, kryetar i Partisë Socialiste deklaroi sot se imazhi i Shqipërisë në arenën ndërkombëtare ka ndryshuar pasi vendi ka pasur se çfarë të tregojë.

Gjatë mbledhjes së Asamblenë e Partisë Socialiste të njësisë 14 në Tiranë, Rama u ndal te rritja e numrit të turistëve dhe të investimeve të huaja direkte të cilat kanë sjell zhvillim ekonomik.

“Krijimi i respektit në arenën ndërkombëtare nuk është çështje thjesht si vishesh apo si flet, por është edhe çështje se kë përfaqëson dhe çfarë përfaqëson. Unë besoj se ndryshimi i pozicionit tonë në arenën ndërkombëtare ka ardhur si rezultat i faktit se kemi pasur edhe çfarë të tregojmë, jo thjesht se kemi ditur si ta tregojmë”, tha Rama.

Kryeministri theksoi se “kemi pasur mundësinë të tregojmë një Shqipëri ndryshe, një Shqipëri tjetër”.

“Kur kemi filluar këtë punë Shqipëria ishte mbi 2 milionë turistë dhe turistë numëroheshin edhe ata që ktheheshin nga udhëtime jashtë shtetit. Numëroheshin të gjithë ata që hynin në Shqipëri pavarësisht se kishin pasaportë shqiptare apo të huaj”, tha Rama.

Rama theksoi se tani kemi arritur në 12 milionë turistë me pasaportë të huaj.

Ndërkohë sipas tij, mesatarja e investimeve të huaja më parë ishte ishte 300-400 milionë euro ndërsa tani kemi kaluar 1.5 miliard euro.

“Të gjitha këto janë para që vijnë në ekonomi”, shtoi Rama.

Burimi ATSH