Drejtoria e Përgjithshme e Tatimeve shënoi një performancë pozitive në mbledhjen e të ardhurave për periudhën janar-dhjetor 2025, duke arritur shumicën e objektivave të vendosura për vitin e kaluar.

Objektivat kryesore të DPT-së gjatë vitit 2025 kanë përfshirë rritjen e pajtueshmërisë vullnetare, përmirësimin e mbledhjes së të ardhurave mbi parashikimet, sigurimin e shërbimeve më të mira për tatimpaguesit, luftën kundër informalitetit dhe trajnimin e vazhdueshëm të stafit të administratës tatimore.

Sipas raportit të DPT-së, për vitin 2025 të ardhurat tatimore neto u realizuan në 280,9 miliard lekë, ose 12,5% më shumë krahasuar me 2024.
Kontributet e sigurimeve shoqërore dhe shëndetësore u realizuan në 172,5 miliardë lekë, ose me rritje 10,6% krahasuar me vitin 2024.

Sa i takon performancës sipas llojit të tatimeve:

TVSH u realizua në vlerën e 68,7 miliardë lekëve, 15% më shumë se 2024.

Rimbursimi i TVSH-së u realizua 25,3 miliardë lekë, 13,1% më shumë krahasuar me 2024.

Tatimi mbi fitimin u realizua në vlerën e 58,7 miliardë lekëve, ose 2,1% më shumë krahasuar me 2024.

Tatimi mbi të ardhurat personale u realizua në vlerën e 82,7 miliardë lekëve, 23,9% më shumë krahasuar me 2024.

Taksat dhe tarifat kombëtare u realizuan 18,5 miliardë lekë, ose 5,3% më pak krahasuar me vitin 2024 dhe taksa e qarkullimit dhe e karburantit u realizua në vlerën 24,2 miliardë lekë, me rritje 13,4% krahasuar me 2024.

Rezultatet e vitit 2025 tregojnë se administrata tatimore ka shënuar rritje të qëndrueshme në mbledhjen e të ardhurave, duke kontribuar në stabilitetin fiskal dhe përmirësimin e shërbimeve për tatimpaguesit.

Burimi ATSH