Kryeministri Edi Rama, në podkastin e përjavshëm “Flasim”, vlerësoi ecurinë pozitive të ekonomisë shqiptare dhe nënvizoi diversifikimin e saj si një faktor kyç për zhvillimin e qëndrueshëm të vendit.

“Ekonomia shqiptare vijon të rritet dhe ruan trendin e vet pozitiv”, tha Rama, duke iu referuar shifrave të publikuara për tremujorin e fundit të vitit 2025.

Sipas tij, rritja ekonomike në këtë periudhë arriti në afro 4%, një tregues i vazhdimësisë së ritmit të qëndrueshëm të zhvillimit gjatë gjithë vitit të shkuar dhe viteve të mëparshme.

“Shifrat e tremujorit të fundit japin një pasqyrë të qartë të ecurisë së qëndrueshme ekonomike të vendit dhe konfirmojnë vazhdimësinë e një ritmi të qëndrueshëm zhvillimi”, u shpreh Kryeministri.

Rama gjithashtu vuri në dukje rëndësinë e diversifikimit të ekonomisë shqiptare.

“Ajo që ka rëndësi të theksohet është se ekonomia vazhdon të diversifikohet dhe Shqipëria nuk është më një ofertë ekonomike për të gjithë ata që duan të krijojnë sipërmarrje apo të investojnë vetëm në një apo dy drejtime, por në thuajse çdo drejtim”, shtoi ai.