Drejtoresha e Agjencisë Shqiptare të Zhvillimit të Investimeve (AIDA), Laura Saro deklaroi sot se Shqipëria ofron mundësi konkrete për investime në sektorë kyç të ekonomisë, duke nxitur inovacionin dhe zhvillimin e qëndrueshëm.

Gjatë edicionit të dytë të “MatchMaker Albania 2026”, ku morën pjesë kryeministri Edi Rama dhe përfaqësues të tjerë të qeverisë, Saro theksoi se vendi nuk po vepron thjesht me premtime, por me rezultate konkrete dhe projekte të gatshme për t’u realizuar.
“Në këtë sallë flasim për një mozaik të gjallë, për një Shqipëri që ndërton ura dhe mbjell fara të reja për zhvillimin ekonomik dhe social”, u shpreh ajo.

Drejtoresha e AIDA-s shpjegoi se fokusi i këtij edicioni ishte te katër fusha kyçe.

“Pasuritë e luajtshme të së ardhmes dhe zhvillimi i destinacioneve mikpritëse dhe urbanizimi; energjia e ripërtëritshme dhe zgjerimi i kapaciteteve energjetike, ku Shqipëria po shndërrohet në një “fabrikë të gjelbër” me projekte publike dhe private të gatshme për përshkallëzim në të gjithë vendin; bujqësia me teknologji të lartë, ku prodhimet në serat moderne po orientohen drejt eksportit; dhe horizontet digjitale, ku energjia rinore takohet me energjinë digjitale globale, e fuqizuar nga politika mbështetëse dhe inovacioni”, nënvizoi Saro.

Sipas saj, mesazhi është i qartë, të gjitha platformat, institucionet dhe partnerët financiarë janë të angazhuar dhe projektet janë gati për t’u realizuar.

“Ky është momenti për të vepruar. Tek AIDA nuk promovojmë vetëm mundësi, por i strukturojmë ato dhe veprojmë si partner strategjik për investitorët”, tha Saro, duke vënë theksin te rëndësia e krijimit të urave bashkëpunimi midis institucioneve dhe sektorit privat, me besueshmëri dhe transparencë në çdo hap, me qëllim final zhvillimin e qëndrueshëm ekonomik të vendit.

Burimi ATSH