Për të gjithë myslimanë anembanë botës, nata e fundit e agjërimit shënon përmbylljen e një udhëtimi shpirtëror 30-ditor. Pas një muaji të tërë përkushtimi, sakrifice dhe reflektimi shpirtëror, kjo natë vjen si moment shumë i veçantë për çdo besimtar.

Kryeministri Edi Rama përcolli sot në rrjetet sociale urimin që çdo agjërim dhe lutje të jetë pranuar.

“Le të hyjmë në festën e Bajramit me çdo të mirë për ju dhe familjet tuaja”, u shpreh Rama.

Ramazani është muaji ku besimtarët myslimanë ndërpresin ushqimin, pijen e jo vetëm, duke filluar që nga nisja e agimit deri në perëndim të diellit (nga syfyri deri në iftar); është një muaj i vlerave të larta njerëzore, morale e sociale, muaji i solidaritetit dhe bashkëpunimit, muaj që i dedikohet më shumë adhurimit dhe këndimit të Kuranit; muaji i sadakasë dhe i punëve të mira, muaji i mëshirës, virtytit dhe dhembshurisë.

Ndërsa, muaji i agjërimit përcaktohet në bazë të lëvizjes së hënës, e cila, për të gjithë myslimanët në çdo cep të botës, përcjell një drejtësi apo një harmonizim për ta kryer sa më të plotë këtë muaj të begatë.

Pas agjërimit 30-ditor, besimtarët myslimanë festojnë nesër, 20 mars, festën e Fitër Bajramit, ndërsa falja e namazit do të nisë nga sheshi “Skënderbej” në orën 06:30.

Burimi ATSH