Programi “Toka në Shkollë” i shtrirë vitet e fundit në të gjitha shkollat e vendit po ndryshon mendësinë e nxënësve për t’u lidhur më shumë me natyrën dhe për t’u përkujdesur për të.

Të vegjlit e shkollës “Andrea Stefani” kanë punuar tokën në ambientin e institucionit dhe kanë mbjellë fara e fidanë në kuadër të kësaj nisme të veçantë.

Kryeministri Edi Rama ka ndarë në rrjetet sociale momente gjatë aktivitetit ku fëmijët shihen me vegla pune në duar.

“Energji e mirë nga vogëlushët e shkollës ‘Andrea Stefani’, të cilët në kuadër të programit ‘Toka në Shkollë’ punuan tokën e shkollës, mbollën fara, fidanë e bimë dekorative dhe do të kujdesen çdo ditë që kopshti i tyre të lulëzojë”, shprehet Rama.

“Toka në Shkollë” është një program i Ministrisë së Arsimit ku nxënësit jo vetëm zhvillojnë aftësi praktike, por edhe ndërgjegjësohen për rëndësinë e mjedisit dhe ushqyerjes së shëndetshme.

Burimi ATSH