Punësimi në Shqipëri ka shënuar rritje në tremujorin e katërt të vitit 2025, ndërsa sektori i shërbimeve vijon të mbetet kontribuesi kryesor në këtë rritje.

Sipas të dhënave të publikuara nga Instituti i Statistikave (INSTAT), shkalla e punësimit për popullsinë 15 vjeç e lart arriti në 58,5% në tremujorin e katërt të vitit 2025. Krahasuar me të njëjtën periudhë të një viti më parë, ky tregues është rritur me 0,9 pikë përqindje, ndërsa në raport me tremujorin e mëparshëm ka shënuar një ulje të lehtë prej 0,3 pikë përqindje.

Të dhënat tregojnë gjithashtu se shkalla e pjesëmarrjes në forcat e punës për popullsinë 15–64 vjeç arriti në 75,9%. Krahasuar me tremujorin e katërt të vitit 2024, ky tregues është rritur me 0,4 pikë përqindje, ndërsa në raport me tremujorin paraardhës është ulur me 0,6 pikë përqindje.

Ndërkohë, shkalla e papunësisë për popullsinë 15 vjeç e lart rezultoi 8,3% në tremujorin e katërt të vitit 2025. Ky tregues është ulur me 0,5 pikë përqindje krahasuar me të njëjtën periudhë të vitit 2024, ndërsa është rritur me rreth 0,2 pikë përqindje krahasuar me tremujorin e tretë të vitit.

Sipas INSTAT, rritja e punësimit është ndikuar kryesisht nga zgjerimi i aktivitetit në sektorin e shërbimeve, i cili vijon të jetë sektori me peshën më të madhe në tregun e punës dhe me rritjen më të dukshme të punësimit.

Treguesit kryesorë të tregut të punës publikohen çdo tremujor dhe përfshijnë të dhëna mbi pjesëmarrjen në forcat e punës, punësimin dhe papunësinë në vend.

Burimi ATSH