Në vitin 2024 në Shqipëri rezultojnë 119 870 ndërmarrje aktive, me një rritje prej 2,2 % krahasuar me vitin 2023, sipas rezultateve finale të Anketës Strukturore të Ndërmarrjeve.

Të dhënat tregojnë se numri i të punësuarve arriti në 551.189 persona, duke shënuar një rënie prej 1,6 % në raport me një vit më parë. Ndërkohë, shitjet neto kapën vlerën e 3 533 miliardë lekëve, në rritje me 4,5 % krahasuar me vitin 2023.

Sa i përket strukturës së ekonomisë, prodhuesit e shërbimeve vijojnë të dominojnë tregun, duke përbërë 86,8 % të ndërmarrjeve aktive, 65,6 % të të punësuarve dhe 68,3 % të shitjeve neto. Brenda këtij grupi, tregtia mban peshën kryesore si në numrin e ndërmarrjeve, ashtu edhe në punësim dhe volum shitjesh.

Nga ana tjetër, sipas INSTAT, prodhuesit e të mirave përfaqësojnë 13,2 % të ndërmarrjeve aktive, ndërsa realizojnë 31,7 % të shitjeve neto dhe 34,4 % të punësimit në shkallë vendi.

Të dhënat konfirmojnë rritjen e aktivitetit ekonomik në terma të shitjeve, ndërkohë që tregu i punës ka shfaqur një tkurrje të lehtë gjatë vitit 2024.

Burimi ATSH