Qeveria ka fuqizuar më tej skemën e mbështetjes për startup-et në kuadër të Grantit 2026, duke e strukturuar financimin sipas fazës reale të zhvillimit të biznesit.

Kryeministri Edi Rama bëri të ditur sot, gjatë podkastit “Flasim”, se në fazën fillestare do të mbulohen 100% e kostove.

“Pastaj në fazën e vlerësimit financimi rritet, duke shkuar me mbulim 85% për startup-et që kanë testuar produktin dhe që po konsolidojnë modelin e biznesit. Ndërsa, në fazën kur vjen rritja e startup-it në fushën e lojës konkurruese, financimi shkon në 75% për kompani që janë në treg dhe që pikërisht po synojnë të ngjiten”, sqaroi Rama.

Kjo, sipas tij, “nuk është thjesht një skenë financimi por është një mekanizëm për të kultivuar një kulturë të re sipërmarrjeje”.

“Sipërmarrje që bazohet tek kurajoja, tek inovacioni dhe tek orientimi drejt tregut global, gjë që po e bëjmë me gjithmonë e më shumë sukses, gjithmonë e më shumë sipërmarrje njerëzish, vajzash dhe djem të talentuar të këtij vendi”, tha Rama.

Shqipëria, sipas kreut të qeverisë, nuk mund të ndërtojë një ekonomi konkurruese vetëm mbi sektorët tradicionalë, por me fokus në teknologji, shërbime digjitale, inteligjencë artificiale.

“Duhen produkte me vlerë të shtuar, që konkurrojnë jashtë në tregun rajonal dhe europian, pa i nxitur të rinjtë dhe të rejat e talentuara, që të ikin nga ky vend, por që nga ky vend të pushtojnë botën”, theksoi kryeministri Rama.

Marrë nga ATSH