Në të gjithë vendin nxënësit e shkollave të mesme zhvilluan fazën e parë të Festivalit të Shkencës.

Kryeministri Edi Rama ndau në rrjetet sociale shembullin frymëzues të nxënëseve të gjimnazeve të Durrësit në fazëne parë të këtij festivali.

“Nga energjia dhe mjedisi, tek inteligjenca artificiale dhe teknologjia, çdo ekip solli në fazën e parë të Festivalit të Shkencës kërkim, analizë dhe guxim për të menduar ndryshe. Ky festival po nxjerr në pah se nxënësit tanë nuk mësojnë vetëm teori, por ndërtojnë zgjidhje, eksperimentojnë dhe sfidojnë veten përtej klasës”, theksoi Rama.

Kryeministri Rama u shpreh se me prezantimet dinjitoze nxënësit e Drejtorisë Rajonale të Arsimit Parauniversitar Durrës treguan përkushtimin e tyre në lëndët shkencore.

Faza e dytë e Festivalit të Shkencës do të zhvillohet 3-16 mars 2026. Në këtë fazë çdo Zyrë Vendore e Arsimit Parauniversitar (ZVAP) organizon Festivalin e Shkencës në nivel vendor, me pjesëmarrjen e shkollave të mesme brenda juridiksionit të saj. ZVAP organizon Festivalin e Shkencës në një mjedis të përshtatshëm, ku nxënësit kanë mundësi të prezantojnë projektet e tyre përpara jurisë vlerësuese dhe publikut të ftuar, si nxënës, mësues, prindër dhe partnerë të tjerë lokalë.

Në përfundim të kësaj faze, juria në nivel ZVAP-i shpall gjithsej 1–2 projekte fituese, të cilat kualifikohen për në fazën II në Festivalin Rajonal të Shkencës (nivel DRAP-i).

Në kuadër të Festivalit Kombëtar të Shkencës, nxënësit e shkollave të mesme zhvillojnë dhe të prezantojnë projekte që pasqyrojnë kreativitetin, mendimin shkencor dhe aftësinë për të zbatuar dijet teorike në kontekste praktike.

Projektet mund të kenë forma dhe qëllime të ndryshme, duke reflektuar larmi qasjesh dhe fushash ndërdisiplinore.

Burimi ATSH