Ministrja e Ekonomisë dhe Inovacionit, Delina Ibrahimaj, deklaroi se nisma “Pasqyra e Çmimeve” synon të që të krijojë transparencë dhe të japë informacion mbi nivelin e çmimeve të produkteve në vend.

Në takimin me rrjetet e supermarketeve dhe furnitorët ku u diskutua për platformën e re digjitale për transparencën e çmimeve, Ibrahimaj tha se nisma do të mundësojë informacion më të detajuar për çmimet në nivel produkti, përtej treguesve të përgjithshëm të inflacionit.

“Qytetarët kanë nevojë që të kenë informacion të detajuar dhe një mënyrë të thjeshtë për të kuptuar se ku çmimet janë më të lira”, u shpreh ministrja.

Ajo theksoi se “ne nuk kemi në dorë të ndikojmë tregun ndërkombëtar, por ne kemi në dorë që të bëjmë transparencë për qytetarët dhe kjo është ajo që duam të bëjmë.
Ndërkohë që, përveç transparencës, është e rëndësishme që ne bashkërisht të kuptojmë se çfarë ndodh me çmimet”.

Ibrahimaj theksoi se “forcimi i lekut dhe rënia e euros duhet të kishte ndikuar domosdoshmërisht në një reduktim të çmimeve, duke qenë se minimalisht 40% e produkteve të shportës importohen”.

Në kuadër të nismës, ministria u ka kërkuar rrjeteve kryesore të supermarketeve të vendosin në dispozicion listat e produkteve më të shitura, përfshirë artikuj ushqimorë të shportës dhe produkte higjiene, si të prodhuara në vend, ashtu edhe të importuara.

Ibrahimaj bëri të ditur se, pas dy javësh kohë të lënë në dispozicion, vetëm një prej rrjeteve të supermarketeve ka dorëzuar listën e kërkuar.

Ministrja tha gjithashtu se kjo nismë nuk bëhet në Shqipëri për herë të parë. “Është bërë në Greqi, është bërë në Itali, është bërë në Spanjë, në Portugali, në Hungari. Pra, kemi marrë modelet e vendeve të tjera. Nuk po bëjmë asgjë që nuk ndodh në një vend tjetër dhe të gjithë ramë dakord që, sigurisht, stimulon konkurrencën”, nënvizoi Ibrahimaj.

Ajo shtoi më tej se është diskutuar edhe një nismë tjetër, sipas modelit të Greqisë, për krijimin e një liste produktesh me çmime të ulëta për shtresat në nevojë, të cilat supermarketet do t’i ofronin me fitim minimal ose zero deri në fund të vitit.

Edhe për këtë nismë, sipas saj, vetëm një subjekt ka paraqitur listën përkatëse.

“Përveç qëllimit të fitimit, kompanitë patjetër të mendojnë edhe për mbrojtjen e konsumatorit, edhe për të mirën publike”, tha Ibrahimaj.

Takimi u zhvillua me pjesëmarrjen edhe të ministrit të Financave dhe Kryeministrit, në kuadër të diskutimeve për transparencën e çmimeve dhe monitorimin e marzheve në zinxhirin e furnizimit.

Burimi ATSH