Kryeministri Edi Rama njoftoi rritje të ndjeshme, vit pas viti, të buxhetit për mbështetjen e sektorit të teknologjisë dhe inovacionit.

Duke folur në Forumin e Dytë për Inteligjencën Artificiale, që u mbajt sot në Tiranë, Rama tha se mbështetja financiare do të shoqërohet me nxitjen e bashkëpunimit mes kompanive, biznesit dhe universiteteve, me synim zhvillimin e mëtejshëm të ekosistemit të inovacionit në Shqipëri.

“Ne do ta rrisim në mënyrë shumë të ndjeshme vit pas viti buxhetin për të mbështetur sektorin”, deklaroi Rama.

Kryeministri u bëri thirrje kompanive të shfrytëzojnë mundësitë për të krijuar bashkëpunime me biznesin dhe universitetet, ndërsa projektet inovative që zhvillohen në këtë kuadër të marrin edhe mbështetjen e shtetit.

“Do t’i bëja thirrje kompanive të shikojnë pikërisht rrugët e gjetjes së kësaj mbështetjeje përmes bashkëpunimeve me biznesin, përmes bashkëpunimeve me universitetin dhe përmes inovacioneve që pastaj do të marrin edhe mbështetjen e shtetit për t’u zhvilluar më shumë brenda këtij ekosistemi”, tha ai.

Rama theksoi se pjesë e këtij procesi do të jetë edhe rritja e mbështetjes për start-up-et, por jo vetëm, duke vlerësuar se ekosistemi shqiptar i inovacionit ka nisur të konsolidohet.

“Kjo do të kërkojë një rritje të ndjeshme të mbështetjes për start-up-et dhe jo vetëm për start-up-et dhe këtë gjë ne jemi absolutisht të gatshëm që ta bëjmë duke parë që tanimë ekosistemi ka filluar të krijojë një muskulaturë të vetën edhe pse të brishtë, por të gatshme për t’u ushqyer më shumë edhe për të marrë më shumë përsipër”, përfundoi Rama.

Marrë nga ATSH