Qytetarët që kanë një dëshmi trashëgimie dhe duan ta regjistrojnë atë pranë Kadastrës Shqiptare mund të përfitojnë nga lehtësimi i shmangies së kamatëvonesës, nëse aplikojnë brenda 30 ditëve nga data e çeljes së dëshmisë.

Kadastra Shqiptare ka bërë të ditur se procedura e aplikimit mund të kryhet edhe në rastet kur qytetarët nuk disponojnë të dhënat e plota kadastrale të pronës, duke ndjekur hapat përkatës në platformën e-Albania.

Për të kryer aplikimin, qytetarët duhet të identifikohen në e-Albania, të zgjedhin shërbimin “Aplikim për regjistrim të aktit të trashëgimisë” dhe të krijojnë një aplikim të ri.

Në rastet kur mungojnë të dhënat kadastrale të pronës, aplikanti duhet të përdorë opsionin “+ shto pronë” dhe të plotësojë të dhënat orientuese: Zona Kadastrale 9999, Volumi 99 dhe Faqja 999, duke vijuar më pas me hapat e aplikimit.

Pas përfundimit të procedurës, qytetarët mund të shkarkojnë mandatin e pagesës dhe ta kryejnë atë online, në bankë ose pranë çdo pike të Postës Shqiptare.

Kadastra Shqiptare u bën thirrje qytetarëve që, përveç aktit të trashëgimisë, të ngarkojnë edhe çdo dokument apo informacion tjetër që disponojnë për pronën, si aktet e fitimit të pronësisë, të dhënat e pronarit apo dokumente të tjera ndihmëse.

Sipas Kadastrës, paraqitja e sa më shumë të dhënave lehtëson identifikimin e pronës dhe përshpejton trajtimin e kërkesës për regjistrim.

Burimi ATSH