Ministri i Bujqësisë dhe Zhvillimit Rural, Andis Salla, së bashku me Kryetarin e Bashkisë Maliq, Gëzim Topçiu, inspektuan ecurinë e punimeve të saponisura për rehabilitimin e mbrojtjes së argjinaturës së lumit Devoll, një investim i rëndësishëm që synon rritjen e sigurisë së tokave bujqësore dhe mbrojtjen e zonave përreth nga rreziku i përmbytjeve dhe erozionit.

Punimet përfshijnë ndërtimin e mbrojtjes me gabione dhe gurë kave në një gjatësi prej 350 metrash linearë në secilën anë të argjinaturës, me një volum prej rreth 5.000 m³ gurë, duke forcuar qëndrueshmërinë e saj përballë prurjeve të larta dhe fenomeneve natyrore.

Ky investim do të rrisë sigurinë e infrastrukturës ujore, do të mbrojë sipërfaqet bujqësore dhe do të krijojë kushte më të sigurta për zhvillimin e aktivitetit bujqësor dhe jetën e banorëve të zonës, si pjesë e investimeve të vazhdueshme të Ministrisë së Bujqësisë dhe Zhvillimit Rural në sistemin e ujitje-kullimit dhe mbrojtjes nga përmbytjet.

Marrë nga ATSH