Shqipëria dhe Indonezia kanë hedhur një hap të ri në forcimin e bashkëpunimit ekonomik, përmes nënshkrimit të një Memorandumi Mirëkuptimi për mobilitetin e fuqisë punëtore.

Marrëveshja u nënshkrua në Xhakartë nga ministrja Ekonomisë dhe Inovacionit, Delina Ibrahimaj, dhe ministri indonezian për Mbrojtjen e Punëtorëve Migrantë, Mukhtarudin, në ambientet e Ministrisë për Mbrojtjen e Punëtorëve Migrantë (P2MI).

“Ky memorandum krijon bazat për një bashkëpunim të strukturuar, që do të mundësojë migracion të rregullt, të sigurt dhe të qëndrueshëm për punësim, duke iu përgjigjur nevojave të ekonomisë shqiptare për fuqi punëtore”, deklaroi Ibrahimaj.

Sipas saj, bashkëpunimi do të jetë i rëndësishëm veçanërisht për sektorët ku Shqipëria ka kërkesë të lartë për punonjës, si turizmi dhe mikpritja, prodhimi, ndërtimi dhe fusha të tjera të ekonomisë.

Memorandumi synon të krijojë mekanizma bashkëpunimi për menaxhimin e lëvizshmërisë së fuqisë punëtore, duke garantuar procedura të rregullta dhe respektimin e të drejtave të punonjësve.

“Ky është një tjetër hap konkret në zgjerimin e partneriteteve ndërkombëtare të Shqipërisë dhe në mbështetjen e zhvillimit ekonomik përmes bashkëpunimit dhe lëvizshmërisë së ligjshme të fuqisë punëtore”, deklaroi Ibrahimaj.

Burimi ATSH