Kryeministri Edi Rama ndau sot pamje nga punimet për rehabilitimin e rrugës “Adria” në Durrës, një prej akseve të rëndësishme të qytetit bregdetar.

Përmes një reagimi në rrjetet sociale, Rama u shpreh se investimi synon ta kthejë këtë rrugë në një hapësirë më të sigurt, funksionale dhe moderne për qytetarët dhe vizitorët.

“Një nga akset më të rëndësishme të Durrësit, rruga ‘Adria’, po shndërrohet në një rrugë më të sigurt, më funksionale dhe më bashkëkohore për qytetarët dhe vizitorët”, shkroi Rama.

Projekti përfshin sistemimin e trotuareve, krijimin e hapësirave të gjelbra, përmirësimin e ndriçimit dhe një transformim të përgjithshëm të pamjes urbane të zonës.

Kryeministri e cilësoi këtë investim si një tjetër hap në drejtim të përmirësimit të infrastrukturës urbane dhe rritjes së cilësisë së hapësirave publike në qytetin e Durrësit.

Burimi ATSH