Investimi në rrugën e re të Komanit ka lehtësuar ndjeshëm lëvizjen drejt zonës e cila vizitohet nga vendas e të huaj për peizazhet e paprekura natyrore.

Zëvendëskryeministrja Albana Koçiu ndau sot opinione të vizitorëve vendas dhe të huaj, të cilët vlerësojnë përmirësimin e rrugës së Komanit.

“Entuziazmi dhe vlerësimet e vizitorëve vendas e të huaj janë treguesi më i qartë se investimet në infrastrukturë po sjellin zhvillim, po forcojnë ekonominë lokale dhe po e pozicionojnë Shqipërinë gjithnjë e më shumë si një destinacion turistik me standarde europiane”, u shpreh Koçiu.

Rruga e Komanit, sipas saj, është një investim që ka përmirësuar aksesin drejt një prej perlave natyrore të vendit, duke u shërbyer jo vetëm banorëve të zonës, por edhe mijëra turistëve që zgjedhin liqenin e Komanit për bukuritë e tij unike.

“Vijojmë pa u ndalur me ‘Punët e Shqipërisë’, me investime që sjellin rezultate konkrete”, tha ajo.

Ndërkohë vizitorë vendas dhe të huaj por edhe banorë të zonës vlerësojnë se infrastruktura e re ka përmirësuar ndjeshëm kushtet e udhëtimit.

“Rruga e re është e mrekullueshme, do të thotë se po bëjnë diçka për turizmin këtu dhe ata bënë një punë vërtetë të mirë. Nuk e di si ishte rruga e vjetër, por dëgjova se ka qenë keq”, u shpreh një turist i huaj.

“Më në fund rruga për në Koman është një rrugë siç duhet, në ndryshim nga vitet e kaluara ku kishte shumë vështirësi për të arritur në Koman”, tha një tjetër turist i huaj.

Ndërsa një banor i zonës u shpreh se rruga e re ka ndikuar në rritjen e numrit të vizitorëve.

“Për sa i përket rrugës është një fat i madh për ne. Zhvillim normal, falënderojmë ata që kanë kontribuar. Ka qenë skandal. Tani edhe turistë po vijnë shumë më shumë se vjet. Më parë as makinat me qera nuk i lejonin të vinin për arsye të rrugës së keqe”, tha ai.

“Unë jam shofer që po vij nga Tirana për në Koman. Rruga ka qenë copë, tani rruga shumë e mirë. Besojmë që do të ketë punë, do të ketë lëvizje. Ka qenë jashtë mase keq”, tha një tjetër qytetar.

/Marrë nga ATSH