Anija turistike “Seven Seas Splendor”, pjesë e kompanisë Regent Seven Seas Cruises, ka mbërritur për herë të parë në Portin e Durrësit, me rreth 650 pasagjerë në bord.

Kryeministri Edi Rama ndau në rrjetet sociale pamje nga mbërritja e turistëve në port.

“Anija turistike e kompanisë Regent Seven Seas Cruises mbërriti me rreth 650 turistë. Përfaqësuesit e kompanisë vlerësuan kushtet dhe facilitetet e ofruara në port, ndërsa vizita u shënua me ceremoninë tradicionale “Maiden Call””, shkruan Rama.

Kompania Regent Seven Seas e ka përfshirë prej vitesh Durrësin në itineraret e saj turistike, ndërsa këtë sezon risia lidhet me imbarkimin nga Porti i Durrësit të 80 pasagjerëve nga vende të ndryshme.

Përfaqësuesit e kompanisë kanë vlerësuar kushtet dhe facilitetet e ofruara në port për pritjen dhe përpunimin e pasagjerëve.
Me rastin e vizitës së parë të anijes në Durrës, në bord u zhvillua ceremonia tradicionale “Maiden Call”, ku morën pjesë Drejtori Ekzekutiv i Autoritetit Portual Durrës, Liburn Aliu, dhe Kapiteni i Portit, Taulant Allka.

Gjatë qëndrimit në Shqipëri, turistët do të kenë mundësi të vizitojnë disa nga atraksionet historike dhe arkeologjike më të rëndësishme të vendit, përfshirë qytetin antik të Durrësit, Kalanë e Krujës dhe qendrën muzeale të Beratit, të mbrojtura nga UNESCO.

Numri i shtuar i mbërritjeve të kroçierave në Durrës tregon një trend pozitiv të zhvillimit të turizmit detar dhe rritjes së të ardhurave nga sektori turistik në vend.