Ministri i Drejtësisë, Toni Gogu, deklaroi sot se qeveria po dëgjon shqetësimet reale të qytetarëve, duke komentuar protestat që po zhvillohen prej 23 ditësh para Kryeministrisë.

I ftuar në emisionin “Të Paekspozuarit” në MCN TV, Gogu tha se gjatë turit të zhvilluar në kuadër të 35-vjetorit të Partisë Socialiste, si dhe në mbledhjet e grupit parlamentar, janë diskutuar problematikat e ngritura nga qytetarët në zona të ndryshme të vendit.

Sipas tij, Kryeministri Edi Rama ka zhvilluar takime me banorë dhe grupe interesi për të dëgjuar shqetësimet e tyre, duke përmendur edhe takimet me banorët e Zvërnecit.

Gogu komentoi gjithashtu ndikimin e teknologjisë dhe rrjeteve sociale në debatin publik, duke theksuar se në epokën digjitale shpeshherë përmbajtjet me më shumë klikime perceptohen si më të besueshme.

Sipas tij, teknologjia dhe algoritmet po sfidojnë demokracinë liberale dhe ndikojnë në mënyrën se si përhapen informacionet dhe shqetësimet publike.

Duke iu referuar kërkesës së protestuesve për dorëheqjen e Kryeministrit dhe qeverisë, ministri theksoi se qeveria aktuale ka marrë mandatin përmes zgjedhjeve të 11 majit dhe se detyra e saj është të vijojë qeverisjen në përputhje me rezultatin zgjedhor.

“Detyra e kryeministrit është të qeverisë vendin”, u shpreh Gogu, duke shtuar se ekzekutivi mbetet i hapur për dialog lidhur me çështjet konkrete të ngritura nga qytetarët.

Burimi ATSH